Segundo a tradición, o corpo do Apóstolo Santiago foi traído desde Jaffa (Palestina) ata Iria Flavia, preto de Padrón, desde onde foi conducido a Compostela. A ruta marítima-fluvial xacobea conmemora, precisamente, esta lenda.
De forma gratuíta previa inscrición, o remonte do río realízase todos os anos, normalmente no mes de xullo, e está organizada pola Fundación na que se integran 18 concellos ribeiregos. Estes poñen a disposición dos visitantes varios barcos para participar na ruta.
Con todo, é posible realizar esta singradura, que permite coñecer e gozar da ría de Arousa e o río Ulla, en calquera momento do ano, pero especialmente no verán, recorrendo aos servizos das empresas Corticata e Alvamar. Como a subida do río depende das mareas, é moi recomendable poñerse previamente en contacto coas empresas citadas.
A Oficina de Turismo da Peixería conta cun selo da Ruta Fluvial Xacobea para poder rexistralo na credencial do camiño.
