É sen dúbida a capital do bo comer en Vilagarcía de Arousa. Na contorna da Praza da Liberdade, a Alameda e o paseo marítimo, sempre con vistas ao mar, ou nas inmediacións da avenida Rosalía de Castro, o visitante ten un bo número de mariscarías ou restaurantes tipo polbeira, asador ou casa de comidas entre os que elixir. E a elección non será fácil.
As ameixas son aquí un manxar case obrigado. Pero hai moitos outros pratos, todos cunha característica común: a calidade da materia prima e a esmerada preparación. Na carta de viños atopará todos o galegos –albariño, ribeiro e godello, entre os brancos; mencía e caíño, entre o tintos- pero tamén calquera denominación de orixe española.
